Sejarah Rawa Binong

Sepenggal Kisah,

Riwayat Rawa Binong

(disusun ku ; mang Ues )

Bahela, jauh kabahela

Satutasna pajajaran burak....

Saabrulan rahayat, ngajauhan puseur dayeuh sura wisesa

Ngitung langkah, mapay-mapay Cipamingkis

Ngajungjung padumukan, nyungsi sarakan lemah harepan

Nu kalangsu anjog ka Cibarusah,

Lemah endah nu mikat duriat pangabetah

Lembur diwangun, lahan di bukbak

Keur ubar katineung ka kuta pajajaran nu ngahilang

Lembur obah ngagedean

Pepek ku rahayat nu geus anak-baranahan

Lahan anyar nu di olah keur tatanen unggal mangsa ngalegaan

Babakan ancal-ancalan masieup ngaplak tegalan

Kakocapkeun.....

Saamparan tegalan nu mangrupa leweung danas

Jadi jugjugan para nonoman nu tanginas

Leweung di bukbrak danas di papras

Teu tolih ku werit cai taneuhna gahar ku panas

Babakan anyar dibuka, di landihan Tegaldanas

Taun 1923, di Tegeldanas.....

Mangsa ki buyut ngukir sajarah :

Yeuh..... kami, buyut samean

Tekad ngabendung lengkob nu ngawahangan

Diantara tegalan jeung sampalan nu hanaan kagaringan.....

Ulah dipugag, ulah dicaram.....

Sabab jami boga kahayang

Ngawaris anak-incu ku karaharjaan

Cai di bendung jadi induk ngababakan

Ngeusi lengkob minuhan wahangan

Mangsa katiga datang, rawa motah ngabanjiran

Tegalan jeung sampalan ngadadak suda ku hanaang

Leuweung danas ditonggohna, mimiti kasilih ku pahumaan

Dil beh lebak hejo lemboh pasawahan

Hehey, deudeuh..... sarerea bungah ati

Lembur garing ngadadak subur ku cai

Nu malawija surak, anu tani suka-seuri

Uyut Samean pads muji

Bagea, aki! bagea, aki!

Taun 1928.....

Aya guntur nu pohara

Ngaranjah rawa ngbibol tanggulna

Uyut Samean reuwas kacida

Masyarakat ngabetem, bengong kasima

Rawa saat, ngoletrak, saharita

Meunggas hareupan para tani jeung palika

Heyy..... ulah lila teuing ngukut tunggaran

Gancang pepekeun balad nu pohara ku tanaga

Urang bendung deui iue rawa

Luhurkeun tanggulna, padeutkeun taneuhna

Ulah poho urang kubur hulu munding keur tumbalna

Mun geus rengse, panggil ketuk tilu jeung ringgengna

Minangka pangbubungah keur balerea, suka cita

Tah.... ti harita,

Ngubur hulu munding jeung nanggap ronggeng dimimitianna

Bendungan ngawujud janten talaga endah, hejo lemboh ku kakauyon

Jadi Oase ditengah amparan tegal nu gahar ngahalodo

Militer betah bubuara muka tangsi sisi kulon

Tutung kidul ciri watesna ngabedega tangkal binong,

Nu ku urang dieu disebutna Gebog kapas nu kajojo

Tah, ku hal eta talaga teh nyandang ngaran Rawa Binong

Cai dibagi ngocor nyalira.....

Ngaliwatan Cimanggala ka Paparean

Kalerna notog ka Panyosogan

Urang Cimahi nu di beh kidul, najan girangeun kabagian

Ka kulona, sisi Cibatu oge ka kucuran

Estu genah sukan-sukan,

Mangfaat rawa binong di walatra keur karaharjaan

Mangka jejeg kana larapan,

Rawa Binong jadi ciyusu wewengkon Jagasatru

Kiwari geus karandapan

Kulantaran kitu,

Piraku urang teu era ku eta jaman

Ngamumule tradisi jeung alam rengkak sajalan

Harmonisasi ngaaujud dina pola kahirupan

Sumarambah dina tingkah jadi budaya anu pinuh ku anjenan

Ulah..... ulah nepi kaleungitna jati diri kadaerahan

Warisan kaduhun nu mangrupa alam jeung tradisi urang keukeuhan

Sangkan aya sampakeun anak incu nu can ngalaman

Para nonoman sekeseler bagasasi

Dangeut ieu geus mejeuhna urang singkil ngahiji

Ulah aing-aingan, hayu geurakeun rengkak saibing

Ngamumule Rawa Binong diwuwuh ati nu wening

Sangkan kajayaan karuhun urang pinareng deui keur nu pandeuri

cag !